F1 系世界顶级嘅赛车比赛，不论系大会或参赛车队都吸引到好多赞助商，而且愈嚟愈多科技品牌出现，F1 大会方面，比较熟悉嘅有电脑大厂 Lenovo，又有加密货币 Crypto.com，部分车队亦有嚟自科技品牌嘅赞助，例如红牛车队有 Oracle、Hass 车队有 Opensea 等，仲有不得不提嘅，梗系 McLaren 车队嘅 Google 啦！

McLaren 近年嘅成绩唔算突出，不过仍然得到唔少赞助，其中 Google 由旧年开始赞助 McLaren 车队，所以响车身拉花见到有 Android logo 同埋机械人头，最特别系响四个辘嘅车铃都有 Chrome 嘅四色圆圈 logo，而今年 Google 继续系 McLaren 嘅赞助商，所以本季沿用旧年嘅车身拉花。

今年 F1 赛事嚟到 7 月已经进行咗一半，而香港时间 7.07 星期五晚至星期日一连三日嘅赛事，会去到英国银石赛道 Silverstone Circuit，而 McLaren 正正就系嚟自英国嘅车队，今次返嚟主场出赛，撞啱今年系佢哋成立 60 周年，所以就决定响主场将两部 MCL60 战车嘅颜色同拉花搞搞新意思喇。

唔知系咪银石嘅关系，两架战车换上银、黑、橙三种颜色配搭，其中 Google 嘅赞助亦有啲改变，会飞走 Android 换成 Chrome，因此 Chrome 嘅 logo 会取代之前响车顶位置嘅 Android logo 同机械人头，当中个「o」字仲换成 Chrome 嘅四色 logo，配以银色底色衬托，成件事即刻出好多，虽然旧年原先嘅设计几有创意，但实际睇住赛车时，个辘系咁转都唔会觉得系 Chrome 罗，家阵就唔同晒喇，起码一定见到 Chrome 嘅 logo 先；另外，车头前翼正面及两侧、车手座位头枕两侧，都见到 Chrome logo。

除咗 Chrome 之外，新嘅拉花亦见到有其他科技品牌嘅 logo 赞助加入，包括 OKX 加密货币（亦系曼城球队赞助商之一）响尾翼正面、两侧及车身两侧较前位置都有 logo，而 Cisco 亦 logo 放咗响车身 OKX logo 隔离，另车头亦有 DELL、Webex by Cisco 同 OKX logo。McLaren 战车新拉花嘅改动都几大，希望今次响主场出击，能够攞到好成绩啦！

顺带一提，Now TV 早排正式同 beIN SPORTS 达成协议，由 5 月尾开始至 2025 年三个赛季，Now TV 嘅 beIN SPORTS 1 频道（即 638 台），会以 4K 超高清画质直播 F1 主赛事，即系话嚟紧嘅星期日就可以睇到 4K 银石赛道主赛事，到时可以好清楚咁睇到 McLaren 战车嘅新拉花同 Chrome logo 有几抢眼喇！